أم الخير
تسلمى من كل شر
مهما كان قمرك بعيد
ومهما موجك غطى بر
هتفضلى ام الشهيد
ام عزة وام نصر
ومهما حاولوا العبيد
يحولوا نفعك لضر
كل يوم عزمك شديد
وفى كل ليلة انتى بدر
مصر ياا أم الحضاره
والقداره فى كل امر
يا عزيزه يا قويه
شابه بشبابك يا مصر
بجدهم لان الحديد
وبالاراده هيوفوا ندر
ينهضوا بيكى من جديد
يحولوا الصحرا مداين
ينفضوا تراب اللى فات
تحبل الازهار جناين
كل يوم فيكى يبقى عيد
خير بيطرد اى شر
ام الدنيا
ام الدنيا مصـر يابـلدى
مين يـابلدنا يحـبـك ادى
مين فى الدنيا داب فى هواكى
زى مادوبت فيكى يابلدى
مهما ولادك قسيوا عليكى
ومهما قسيتى انتى عليهم
نصبر حبه وكله يعـدى
واللى حيفضل م الازمات دى
حبك انتـى بس يابلـدى
ام الدنيا بلـدى يامصـر
كل تاريخك عزه ونصر
كله كفاح وشرف وبطوله
لو حنقول فيه مليون قوله
ولايكفينا عمرنا حصـر
ام الدنيا روحى انا فيكـى
لو تعوزيها اهديها ليكـى
اهديها سيف فى قلوب اعدائك
اهدى حياتى فدا اراضيكى
ويبقى كفايه انى شهيدك
وان بدمى ارتوى وريدك
وانى قدرت يابلدى احميكى
واكسر شوكة مين يعاديكى
ياولاد مصر قولوا معايا
عاشت مصر ام الدنيـا
كلمه بتخرج من جوايـا
مش حتغيب عنى ولاثانيه
انك انتى عندى.. يابلدى
احلى واغلى بلاد الدنيـا
ياام الدنيا
دوبيـنى فى بحـورك
أبدريـنى فـوق رمـالك
تـوهيـنى
غـربيـنى
وارجـعى تـانى بحـنانـك
وابـدريـنى طـرح من ورد وثمـار
زارع الأيـام خَـضَار
فجـر يخـلق لك نهـارِ
إيـد بتبـنى للعمـار
بسـمه تقـضى عَ المرار .. دوبيـنى وسـط ناسـك
قلـبى مشـتاق للـدفـا
ليـه فى ليـلك كنت حـاسـس
ليـه تخـونى عهد مخـلوق للـوفـا ؟
وانتى كان العـدل دينـك
والأمـان دايـماً لجـيلك
والغـريب لـمّا تديق الدنيا بيـه لازم يجيـلك
قلبى باللهـفه يناديلك:
يا بلـدنا لملميـنا
جـوه تـوبك وأجمعيـنا
أوعـى للحـزن تسـيبينا
قاسـى ليـه قلبـك علينا
واحـنا مادينـلك إيـدينا
لاجـل م الغربـه تنادينا
نيجـى ونسـدد جميـلك
دمـنا من نـبع نيـلك
كل نبضـه من قلـوبنا بتنـاديلك:
أوعـى يـاامـه تضـيعينا
مهما عنـك تبعـدينا
أو فـ يوم تقسـى علينـا
مهما روحـنا ولاَّ جـينـا
قلبك أكيـد هـايحـن ليـنا
ويـناديـنا
نيجـى والـدمـع فـ عنيـنا لاجـل تاخـدينا فى حضـنك
مـا انتى ياامـه مهما تقسـى
الحـنان فى الأصـل طـبعـك
لمـلمينى
فـ أرض نيـلك حَ تـلاقيـنى
لو ظـهر حـزن فـ سـنينك
قلبى مليان بالجفا
قمحنا لونه فى جبينك
فى الحقيقه دى قصيده اعجبتنى لاحد المدونين الرائعين
مدونته اسمها سجين الوطن
أوضـه ضلمـه
طيف خيالى
غصب عنى
شت منى
راح وراكى
مش ناسيكى
قلت توبه
مش هافكر
تانى فيكى
رغم إنك
حته منى
كل حته بتشتكيكى
دا إنتى امى
وإي العجيبة
إنى أكتب
شكوى فيكى
مش مصيبه
شكوى منى
فيكى ليكى
وإنتى مش فاهمانى برضوا
ان فيكى
ناس باعوكى
لفوا لفه
وعملوا زفه
وهمّ همّ
بيشتروكى
والمصيبة ف اللى باعك
أكلها والعه
والكلام الإقتصادى
خيبة ناقعه
حته دافية
ولقمة حلوة
وأرض ساقعه
والمُزز زى الجوارى
تبقى حافية
بس حلوة
تبقى نافعه
مسكوا واحده
جوه بيته
مش تخينه
بس رافعه
والتلبس مش قضية
ألف ميت مليون محامى
والمحامى يبقى جوزها
أصله راجل
دمه حامى
والبراءة حكم نافذ
من يومين
بعد المرافعه
والجراءة للى عايز
ماتخافوش
دى الست دافعه
إختشوا
جتكم مصيبه
دى البلد صبحت زريبه
والمواشى لسه عايشة
واللى يصرخ
تبقى عيبه
واللى يكتب
كلمة حرة
ليلته سوده
يتحبس ويا الكلاب
ويخش أوضه
إعترف يا إبن اللئيمه
إمضى وإركع
لسه سامعينه بيصرخ
والعذاب أصله بيوجع
كل واحد
له محاولة
ضرب جامد
أو مداولة
يعنى قول اللى إنتََ عارفه
واللى مش عارف تقوله
برضه قوله
دى قضية أمن دولة
راح بلاش
واللى يسأل عنه قالوا
راح ما جاش
زى غيره
اللى راكب فى السفينه
برضوا قالوا
راح ماجاش
واللى ساكن ف الدويقة
راح بلاش
قومى يأمه
كلنا عايشين فى غـُُمه
فوق جبينك
جسر عالى
نفسى أطوله
والكلام فى الصدر يوجع
نفسى أقوله
واشتكيكى
لو عرفتى
قد إيه احساسى بيكى
لو عرفتى
قد إيه محتاج إليكى
يبقى لازم ياحبيبتى
ماتخافيش
ليه تخافى
وانتى همى
ليل نهار
والمشاعر ثورة قايده
والعه نار
واللى فيكى برضوا فيا
واللى حاصل مش شويه
افتحى بابك يا امى
يا جميلة يا بهية
عارفة ليه راقبوا كلامى
عارفه ليه قبضوا عليا
غير بحبك حب صادق
حبى كان هوّ القضية